STUDENTËT E USH-SË DO TË INTERPRETOJNË “RINOCERONTIN” E JONESKOS NË SKENËN E TEATRIT “MIGJENI”

Në kuadër të 60-vjetorit të themelimit, Universiteti i Shkodrës “Luigj Gurakuqi” në bashkëpunim me Bashkinë e Shkodrës dhe teatrin “Migjeni” po vijon projektin për vënien në skenë të pjesës teatrale “Rinoceronti” të autorit Eugjen Jonesko.

Kjo shfaqje është një iniciativë e Rektoratit të USH-së, nën kujdesi e veçantë të rektorit, prof. dr. Adem Bekteshi. Ajo vjen në vazhdën e një tradite tashmë të krijuar me vënien në skenë suksesshëm të komedisë “Bretkosat” të Aristofanit më 27 dhe 28 maj 2015, një ngjarje artistike, që u përcoll nga një jehonë e gjerë mediatike kombëtare dhe lokale.

“Rinoceronti” është pa dyshim një nga pjesët më të qarta dhe më të shfaqura në skenat evropiane të Eugjen Joneskos, këtij dramaturgu të madh francez me origjinë rumune. Vepra ngrihet si një aktakuzë e fuqishme kundër çdo lloj diktature, e kuqe apo e zezë qoftë, që e katandis njeriun në një hiç, e detyron të tjetërsohet e të bëhet kafshë dhe nëse dëshiron të mbijetojë, e bën të jetë hipokrit, e zhvesh nga idealet; e kthen dhe e bën një lodër qesharake forcën e logjikës njerëzore. Fjalës së tij i heq çdo kuptim dhe e bën njeriun që ta ndiejë veten të vetmuar, edhe kur ndodhet në mes të të tjerëve.

Mendojmë se kjo pjesë do të ketë një pritshmëri të mirë nga spektatori, pasi në esencë është humaniste, plot ironi dhe humor që është shprehje e një epërsie shpirtërore. Shfaqja duhet të përcjellë tek studentët-spektatorë dhe më gjerë mesazhin e besimit tek njeriu që nuk dorëzohet duke mbrojtur deri në fund me krenari idealin e tij human. Para së gjithash kjo është një dramë kundër epidemive dhe histerive kolektive, duke e lënë shtegun të hapur për interpretime nga më të ndryshmet. Ideja e saj liberale përkon me idetë universitare që gjithmonë shkojnë kundër totalitarizmave në përgjithësi.

Në datat 20 - 21 - 22 mars 2017, në Sallën e Konferencave (A3) tek Rektorati i Universitetit të Shkodrës “Luigj Gurakuqi” u përzgjodhën 13 studentë të fakulteteve të ndryshme që kanë prirje dhe u pëlqen të merren me teatër. Provat filluan me 29 mars 2017 dhe po zhvillohen çdo ditë në studiot e teatrit “Migjeni”.

Premiera është më 29 dhe 30 maj 2017, ora 19:00, në teatrin “Migjeni”.

Ideja dhe realizimi: Dr. Gëzim Puka, pedagog i Departamentit të Letërsisë.

Regjia: Merita Smaja, Gëzim Puka.

Në rolet e mëposhtme interpretojnë studentët:

Beranzhe -Eduard Hysaj – (Dega Histori, Fakulteti i Shkencave Shoqërore)

Zhani - Lorenc Smajlaj – (Dega Juridik, Fakulteti i Drejtësisë)

Dezi - Dila Prenga – (Master Gjuhë-Letërsi, Fakulteti i Shkencave Shoqërore)

Dydardi - Senad Tula – (Dega Gazetari - Komunikim, Fakulteti i Shkencave Shoqërore)

Znj. Botard - Fatjona Bushaj – (Dega Administrim-Biznes, Fakulteti Ekonomik)

Logjisjeni - Aleksandër Prenga – (Dega Gjuhë-Letërsi, Fakulteti i Shkencave Shoqërore)

Z. Papijon - Ledjan Prebiba – (Dega Financë-Kontabilitet, Fakulteti Ekonomik)

Znj. Bëf - Hymerta Ura - (Dega Gazetari - Komunikim, Fakulteti i Shkencave Shoqërore)

Zotëria Plak - Mark Naçaj – (Dega Gjuhë-Letërsi, Fakulteti i Shkencave Shoqërore)

Amvisa - Xhesika Lika - (Dega Juridik, Fakulteti i Drejtësisë)

Dyqanxhesha - Najada Bregu - (Dega Juridik, Fakulteti i Drejtësisë )

I Zoti i Kafenesë - Donald Zefi - (Dega Administrim- Biznes, Fakulteti Ekonomik)

Kamarierja - Ersilda Tafili – (Dega Administrim-Biznes, Fakulteti Ekonomik)

I urojmë suksese trupës teatrale studentore.